Абай ауданында туризмді жандандыру бағытында маңызды жобалар қолға алынуда
Өңірдегі туризмді дамыту және өлкеге келетін саяхатшылар тасқынын арттыру мақсатында бірқатар ауқымды іс-шаралар мен жаңа турмаршруттар іске асырылуда.
Аудан басшысының айтуынша, бұл бағытта ерекше серпін беретін екі ірі жоба бар. Оның бірі – республикалық деңгейде ұйымдастырылатын «Жеті қазына» спорт, мәдениет және туризм фестивалі, екіншісі – қараша-желтоқсан айларына жоспарланған «Салбұрын» құсбегілер сайысы. Аталған жобалар аясында арнайы турфирмалармен келісімдер жасалып, туристерді жүйелі түрде тарту жоспарланған.
Сонымен қатар, өңірдегі басты тарихи-мәдени орталықтар – Қоңыр әулие үңгірі мен Жидебай бағытында да танымдық туризм қарқынды дамып келеді. Бүгінде мектеп оқушыларының Абай атамыздың өнер-білім жолын, ол өмір сүрген мекенді тек кітаптан оқып қана қоймай, өз көзімен көруіне жағдай жасалуда. Осы мақсатта Білім, Спорт және Туризм басқармаларымен бірлескен кезең-кезеңімен жүзеге асатын арнайы жоспар құрылып, өңірге келетін жастардың саны жылдан-жылға артып келеді.
«Бұл екі шара да өңірдегі туризмді дамытуға үлкен серпін береді. Арнайы турфирмалармен келісе отырып, туристерді тартуды кезең-кезеңмен жоспарлап отырмыз. Сондай-ақ, оқушылардың Абай атамыздың өмір сүрген мекенін өз көзімен көруі үшін тиісті басқармалармен бірлесіп, жүйелі жұмыс жүргізудеміз», – деді Абай ауданының әкімі Мейіржан Смағұлов.
