Президент Жолдауы: Абай облысында халық игілігіне бағытталған құрылыс қарқын алады
Елдің өркендеуі заманауи ғимараттар мен жаңа жолдардың санымен ғана емес, олардың халық өміріне тигізген пайдасымен өлшенеді. Әсіресе әлеуметтік нысандардың қолжетімділігі мен сапалы инфрақұрылым – өңір дамуының маңызды көрсеткіші.
Мемлекет басшысы Қасым-Жомарт Тоқаев 2026 жылғы 28 қазандағы Қазақстан халқына Жолдауында елді ауқымды құрылыс алаңына айналдыру қажеттігін атап өтті. Осы бағытта «Халықтық құрылыс» бастамасы ұсынылып, әлеуметтік нысандарды, көлік инфрақұрылымын және коммуналдық желілерді жаңғыртуға басымдық берілді.
Бұл бастама Абай облысы үшін де маңызды. Қазіргі таңда өңірде жалпы құны 35 млрд теңгені құрайтын 28 әлеуметтік нысанда құрылыс және жөндеу жұмыстары жүргізіліп жатыр. Бұл – білім беру, денсаулық сақтау және әлеуметтік инфрақұрылымды дамытуға бағытталған жұмыстардың бір бөлігі.
Сонымен қатар Семей қаласында «Абайға құрмет» акциясы аясында шығармашылық орталығы, медиа орталық, дене шынықтыру-сауықтыру және инклюзивті спорт кешендері, үстел теннисі орталығы мен Жекпе-жек сарайы салынуда. Алдағы жылдары өңірде жаңа театр, облыстық аурухана және балалар ауруханасын салу жоспарланған.
Көлік инфрақұрылымын дамыту да назардан тыс қалған жоқ. Облыста «Аягөз – Бақты» теміржол желісінің құрылысы жүзеге асырылып жатыр. Бұл жоба өңірдің транзиттік әлеуетін арттырып қана қоймай, жаңа жұмыс орындарын ашуға және экономикалық байланыстарды кеңейтуге мүмкіндік береді.
Дегенмен құрылыс жұмыстарының нәтижесі нысандардың пайдалануға берілуімен ғана шектелмеуі тиіс. Жаңа мектептердегі білім сапасы, ауруханалардағы медициналық қызметтің қолжетімділігі, жолдардың ұзақ мерзімді сапасы – басты назарда болуы қажет.
Президент Жолдауында белгіленген міндеттер Абай облысының даму мүмкіндіктерін кеңейтеді. Ендігі маңызды мәселе – жоспарланған жобалардың уақытылы аяқталып, тұрғындар игілігіне қызмет етуі.
Өйткені құрылыс – тек жаңа нысан тұрғызу емес, ол халықтың ертеңіне жасалған инвестиция.

