Семейде сабақ қандай жағдайда тоқтатылады?

Семей қаласының білім бөлімінде қолайсыз ауа райы жағдайында білім беру ұйымдарында сабақтың тоқтатылу тәртібі түсіндірілді.

Мамандардың айтуынша, сабақтың тоқтатылуына тек қатты аяз ғана емес, сонымен қатар көктайғақ, желдің күшеюі секілді ауа райының қолайсыз факторлары да әсер етеді. Жуырда Семейде сабақтардың тоқтатылуына қатты аяз емес, көктайғақ себеп болған. Алдымен 1–4 сынып оқушылары, кейін 1–9 сыныптар үшін сабақтар тоқтатылды.

Білім бөлімінің мәліметінше, сабақтарды тоқтату кезінде желдің жылдамдығы ескеріле отырып ұсынылатын температуралық көрсеткіштер қолданылады.

Желдің жылдамдығы 2 м/с-тан төмен болған жағдайда:

• 1–4 сыныптар үшін — −28 °C және төмен
• 5–9 сыныптар үшін — −32 °C және төмен
• 10–11 сыныптар және колледждердің I–II курстары үшін — −34 °C және төмен

Желдің жылдамдығы 2 м/с-тан жоғары болған жағдайда:

• 1–4 сыныптар үшін — −23 °C және төмен
• 5–9 сыныптар үшін — −27 °C және төмен
• 10–11 сыныптар және колледждердің I–II курстары үшін — −29 °C және төмен

Аталған көрсеткіштер ұсыныс сипатында екені атап өтілді. Сабақтарды тоқтату туралы түпкілікті шешім нақты ауа райы жағдайына және қауіпсіздік талаптарына сәйкес қабылданады.