Миллиардтар құйылған агросала
Абай облысында ауыл шаруашылығы саласы белсенді дамып келеді. Бұл мәселе облыс әкімі Берік Уәли өткізген кеңейтілген жиында талқыланды.
Соңғы жылдары өңір жақсы нәтиже көрсетіп отыр. 2024 жылы республикада алдыңғы орынға шықса, 2025 жылы үздік үштікке енді.
Егіс көлемі артты. Биыл егіс алқабы 789 мың гектарға жетті. Майлы дақылдар да көбейді. Дала жұмыстарына 14 млрд теңге бөлініп, шаруаларға қолдау көрсетілді. Сонымен қатар 700 жаңа техника алынды.
Жаңа жобалар іске асуда. 2029 жылға дейін жалпы құны 112,5 млрд теңге болатын 19 жоба жүзеге асады. Биыл 6 жоба іске қосылып, 400-ден астам жұмыс орны ашылады.
Өңдеу саласы дамиды. Алдағы уақытта ет комбинаты мен күнбағыс майын шығаратын ірі зауыттар ашылады.
Мал шаруашылығы күшейеді. Бесқарағай мен Жарма аудандарында сүт фермалары, құс фабрикасы салынады. Бұл 2 мыңнан астам жұмыс орны ашуға мүмкіндік береді. Сонымен қатар қой шаруашылығын дамыту үшін 300 мың асыл тұқымды мал сатып алу жоспарланған.
Су жүйелері жаңарады. Өңірде 7 су қоймасы салынып, ирригациялық жүйелер жаңғыртылады.
Аймақ басшысы агросаланы одан әрі дамыту қажет екенін атап өтті. Оның айтуынша, Абай облысының әлеуеті жоғары, сондықтан бұл бағыттағы жұмыс жалғасады.
