Оқу жылы Абай облысында қандай нәтижемен аяқталды?

Абай облысында 2025–2026 оқу жылы аяқталып, өңірдің білім беру жүйесіндегі негізгі нәтижелер айқындалды. Биыл облыс мектептерінде 100 мыңнан астам оқушы оқу жылын аяқтаса, олардың 6065-і мектеп бітіруші түлек ретінде үлкен өмірге жолдама алды. Сонымен қатар 438 оқушы «Алтын белгіге» үміткер атанып отыр. Бұл көрсеткіштер өңірдегі білім сапасының тұрақты даму динамикасын және оқушылардың академиялық жетістіктерге ұмтылысын көрсетеді.

Бүгін облыс мектептерінде оқу жылының аяқталуына арналған салтанатты шаралар ұйымдастырылды. Облыс әкімі Берік Уәли Семей қаласындағы №50 ІТ-мектеп-лицейінде өткен соңғы қоңырау рәсіміне қатысып, түлектерді, ұстаздар мен ата-аналарды құттықтады.

Аймақ басшысы өз сөзінде қазіргі кезеңде білім беру жүйесін жаңғыртудың негізгі бағыттарына тоқталды. Әсіресе, Мемлекет басшысының жасанды интеллект технологияларын білім беру жүйесіне кезең-кезеңімен енгізу туралы бастамасы білім саласын жаңа деңгейге көтеруге бағытталған стратегиялық шешім ретінде бағаланды.

Қазіргі таңда білім беру жүйесіндегі басым міндеттердің бірі – еңбек нарығының жаңа талаптарына бейімделген, технологиялық өзгерістерге икемді мамандар даярлау. Осы тұрғыдан алғанда, өңірде ашылған ІТ-мектеп-лицейлердің маңызы артып келеді. Мұндай білім ұйымдары цифрлық технологияларды меңгерген, инженерлік және ІТ бағытындағы дағдыларды игерген жаңа буын қалыптастыруға мүмкіндік береді.

№50 ІТ-мектеп-лицейінің биылғы оқу жылындағы нәтижелері де осы бағыттағы жұмыстың тиімділігін көрсетеді. Білім ордасын 60 түлек аяқтап отыр. Оның ішінде 3 оқушы «Алтын белгіге», 5 түлек үздік аттестатқа үміткер. Сонымен қатар мектептің 332 оқушысы халықаралық, республикалық және облыстық деңгейдегі олимпиадалар мен ғылыми-білім беру жарыстарының жеңімпазы атанған.

Өңірдегі білім беру жүйесін дамыту тек оқу сапасын арттырумен шектелмейді. Соңғы жылдары білім беру инфрақұрылымын жаңарту бағытында жүйелі жұмыстар жүргізіліп келеді. Президент тапсырмасы аясында облыста бес «Келешек мектебі» мен Оқушылар сарайы пайдалануға берілді. Сонымен қатар Семей қаласында екі мектепке қосымша ғимараттардың құрылысы жүргізілуде. «Абайға құрмет» акциясы аясында жаңа білім нысанын салу жоспарланып отыр.

Жалпы алғанда, оқу жылының қорытындылары Абай облысында білім беру жүйесінің сапалық жаңғыру кезеңіне қадам басқанын көрсетеді. Инфрақұрылымды дамыту, цифрлық шешімдерді енгізу және білім сапасын арттыру бағытындағы жұмыстар өңірдің адами капиталын нығайтудың маңызды тетігі болып қала береді.