Симуляциялық медициналық тренинг өтті

13–14 қараша күндері «СМУ» КеАҚ Университет Госпиталінде медицина мамандарына арналған симуляциялық оқыту бойынша тренинг ұйымдастырылды. Екі күндік бағдарламаны Санкт-Петербургтен келген «Виртумед» ЖШС Бас директоры, РОСОМЕД мүшесі, анестезиолог-реаниматолог Анатолий Евгеньевич Веревкин жүргізді.

Тренингке анестезиолог-реаниматологтар, жедел медициналық жәрдем мамандары, қабылдау бөлімінің қызметкерлері және клиникалық кафедралардың оқытушылары қатысты. Қатысушылар симуляциялық технологияларды қолдану арқылы клиникалық жағдайларды модельдеп, кәсіби дағдыларын пысықтады.

Оқыту барысында «Apollo» симуляторы пайдаланылды. Қатысушылар жүрек-өкпе реанимациясы, трахеяны интубациялау, өмірлік маңызды функцияларды бақылау сияқты тәжірибелік дағдылармен жұмыс істеді. Сонымен қатар пароксизмальды тахикардия, инфекциялық-токсикалық шок, жедел коронарлы синдром секілді шұғыл жағдайларда көмек көрсету тәсілдері қарастырылды.

Ұйымдастырушылардың айтуынша, симуляциялық оқыту медициналық қызметкерлерге нақты клиникалық жағдайларға жақын ортада жұмыс істеуге мүмкіндік беріп, мамандардың тәжірибелік дайындығын арттыруға бағытталған.

Іс-шара тренингке қатысушылардың пікір алмасуымен және алынған дағдыларды талқылаумен аяқталды.