Қалта ұрлығы: Абай облысында 52 дерек тіркелді
Қалта ұрлығы бүгінгі таңда қоғамда кездесетін жағымсыз құқық бұзушылықтардың бірі болып отыр. Мұндай қылмыстар, әдетте, адам көп шоғырланатын орындарда, азаматтардың асығыс немесе алаңдаулы сәттерін пайдалану арқылы жасалады. Қоғамдық көлік, базарлар мен ірі сауда орталықтары қалта ұрлығы жиі тіркелетін орындардың қатарында.
Құқық қорғау органдары қалта ұрлығының алдын алу, қылмыскерлерді анықтау және құқық бұзушылықтардың жолын кесу мақсатында тұрақты түрде профилактикалық және жедел іс-шаралар жүргізіп келеді. Бұл жұмыстар тұрғындардың қауіпсіздігін қамтамасыз етуге бағытталған.
Ағымдағы жылдың басынан бері Абай облысында қалта ұрлығына қатысты 52 дерек тіркелген. Оның 36-сы қоғамдық көлікте орын алған. Сонымен қатар, қоғамдық көлікте бағалы заттардың, әмияндар мен ұялы телефондардың жоғалуына байланысты 61 жағдай тіркелген. Бұл көрсеткіштер азаматтардың жеке мүлкіне ұқыпты қарауының маңыздылығын айқын көрсетеді.
Осыған байланысты Абай облысы Полиция департаменті тұрғындарды күнделікті өмірде барынша қырағы болуға шақырады. Қоғамдық көлікте және адам көп жиналатын орындарда жүрген кезде сөмке мен қалталардың жабық әрі көз алдында болғаны жөн. Бағалы заттарды сыртқы қалталарға салмау, ұялы телефонды бейберекет қолданбау және айналадағы жағдайға назар аудару — қарапайым, бірақ тиімді сақтық шаралары.
Сондай-ақ күмәнді әрекеттерді байқаған жағдайда, өз бетімен әрекет етпей, бірден полиция қызметкерлеріне немесе «102» нөміріне хабарласу қажет.
Азаматтардың жауапкершілігі мен сақтығы қоғамдық қауіпсіздікті нығайтуға, құқық бұзушылықтардың алдын алуға және әрбір тұрғынның жеке мүлкін қорғауға елеулі үлес қосады.
