Аягөз: жер астында жатқан ғасырлар сыры
Аягөз өңірі археологиялық ескерткіштерге бай аймақ. Соңғы жылдары бұл жерде зерттеу жұмыстары жанданып, жаңа нысандар анықталып жатыр.
Ғалымдардың айтуынша, Аягөз көне заманнан бері түрлі мәдениеттер мен тайпалардың тоғысқан жері болған. Бұған дейін де зерттеулер жүргізілгенімен, соңғы жылдары бұл бағытқа ерекше көңіл бөлінуде.
2021–2023 жылдары жүргізілген экспедициялар барысында 100-ден астам археологиялық ескерткіш табылған. Олардың ішінде қола дәуірінен бастап орта ғасырларға дейінгі кезеңдерге жататын нысандар бар.
Зерттеу кезінде қорғандар, жерлеу орындары және көне қоныстар анықталған. Өңірге тән «мұртты қорғандар» да кездеседі.
Соңғы қазба жұмыстары барысында кей қорғандар қалпына келтіріліп, табылған адам сүйектері зертханаға жіберілген. Бұдан бөлек, ерте темір дәуіріне жататын маңызды олжалар табылған.
Мамандар қазір басты назар ескерткіштерді сақтау мен қорғауға аударылып отырғанын айтады. Аягөздегі бұл зерттеулер өңір тарихын тереңірек тануға мүмкіндік беріп отыр.
