Әлеуметтік желідегі идеологиялық ықпалдан сақтану

Қазіргі уақытта әлеуметтік желілер жастардың дүниетанымына тікелей әсер ететін негізгі ақпарат көздерінің біріне айналды. Бұл кеңістік білім алуға, байланыс орнатуға мүмкіндік бергенімен, оның көлеңкелі тұстары да аз емес. Соның бірі – діни бағыттағы идеологиялық ықпал. Соңғы жылдары дәл осы онлайн алаңдар арқылы жастарды түрлі деструктивті ағымдарға тарту әрекеттері жиілеп отыр.

Діни мазмұндағы ақпараттар интернетте өте көп таралады. Алайда олардың барлығы бірдей дәстүрлі немесе сенімді дереккөздерге сүйенбейді. Кейбір топтар дінді өз мақсаттарына пайдаланып, оны бұрмаланған түрде түсіндіреді. Әсіресе «тек біз ғана ақиқат жолдамыз» деген ұстанымды алға тартатын контенттер қауіпті. Мұндай идеялар жастарды өзге пікірді қабылдамауға, қоғамнан оқшаулануға итермелеуі мүмкін.

Әлеуметтік желідегі ықпал көбіне ашық үгіттен емес, жасырын психологиялық тәсілдер арқылы жүзеге асады. Мысалы, алдымен мотивациялық немесе рухани мазмұндағы бейнероликтер ұсынылады. Кейін біртіндеп діни тақырыпқа ауысып, белгілі бір бағытты «таза» немесе «шынайы» деп көрсетеді. Осылайша жасөспірімнің сеніміне кіру арқылы оның көзқарасы өзгере бастайды.

Соңғы уақытта тіркелген кейбір жағдайлар бұл мәселенің өзектілігін айқын көрсетеді. Әлеуметтік желілердегі жабық топтар мен арналарда жастарға діни ұрандармен қатар радикалды идеялар ұсынылған фактілер кездеседі. Құзырлы органдардың мәліметінше, осындай ықпалға түскен кейбір жастар өз ортасынан алыстап, қоғамға қарсы көзқарас қалыптастырған. Бұл – интернеттегі идеологиялық қысымның нақты көрінісі.

Тағы бір мысал – қысқа видеолар арқылы таралатын діни контент. Онда кейде күрделі мәселелер өте жеңіл әрі біржақты түсіндіріледі. Жастар мұны толық зерттемей қабылдап, терең мағынасын түсінбей жатады. Нәтижесінде қате түсінік қалыптасып, радикалды көзқарасқа бейімделу қаупі артады.

Мұндай ықпалдан сақтанудың ең тиімді жолы — дұрыс ақпарат пен сыни ойлау. Ең алдымен, діни білімді сенімді, ресми дереккөздерден алу қажет. Кез келген ақпаратты бірден қабылдамай, оның қайдан шыққанын, кім таратқанын тексеру маңызды. Сонымен қатар діннің негізібейбітшілік, сабыр және төзімділік екенін ұмытпау қажет.

Отбасы мен білім беру ұйымдарының рөлі де ерекше. Жастармен ашық сөйлесу, олардың сұрақтарына нақты әрі дұрыс жауап беру алдын алудың маңызды бөлігі. Егер жасөспірім өз сұрағына жауапты интернеттен емес, жақын ортасынан алса, ол күмәнді ақпаратқа аз ұрынады.