Енді зейнетақы өтінішсіз-ақ өзі түседі

2026 жылғы наурыздан бастап Қазақстанда зейнетақы төлемдеріне қатысты жаңа тәртіп енгізілді. Енді Бірыңғай жинақтаушы зейнетақы қоры (БЖЗҚ) ерікті зейнетақы жарналары есебінен төлемдерді азаматтардың өтінішінсіз-ақ, автоматты түрде жүзеге асырады.

Жаңашылдықтың басты мақсаты – төлем алу процесін жеңілдету және азаматтардың жинақтарының пайдаланылмай қалуын болдырмау. Егер азаматтың ерікті зейнетақы жарналары (ЕЗЖ) бойынша жинағы болса, ол зейнеткерлік жасқа жеткен сәтте БЖЗҚ-ға арнайы өтініш бермей-ақ төлем ала бастайды.

Автоматты төлемдер негізгі зейнетақы рәсімделген кезде қатар жүргізіледі. Яғни мемлекеттік бюджеттен төленетін зейнетақы немесе міндетті зейнетақы жарналары есебінен төлемдер тағайындалғанда, ерікті жарналардағы қаражат та бірге есепке алынып, автоматты түрде төленеді.

Төлем тәртібі жинақ көлеміне байланысты. Егер қаражат белгілі бір шектен аспаса, ол біржолғы төлем ретінде беріледі. Ал жинақ көлемі жоғары болған жағдайда, төлемдер ай сайын негізгі зейнетақымен бірге төленіп, қаражат толық таусылғанға дейін жалғасады.

Сонымен қатар азаматтарға төлем тәртібін өзгерту құқығы сақталады. Қажет болған жағдайда олар БЖЗҚ-ға жүгініп, төлем форматын қайта қарастыра алады.

Жаңа жүйе ең алдымен зейнеткерлік жасқа жеткен, бірақ осы уақытқа дейін ерікті жарналар бойынша төлем рәсімдемеген азаматтарға қатысты. Сонымен бірге 50 жасқа толғандар мен мүгедектігі бар адамдар да бұл санатқа кіреді. Олар қаласа, төлемдерді өз бетінше де рәсімдей алады.

Сарапшылардың пікірінше, бұл өзгеріс зейнетақы жүйесінің қолжетімділігін арттырып, азаматтар үшін процесті барынша жеңілдетуге бағытталған.