Президент: Рухани қазына – ұлттың негізі

Ақордада өткен ғалымдарды марапаттау рәсімінде Мемлекет басшысы Қасым-Жомарт Тоқаев ұлттық зияткерлік мұраны дамыту мәселесіне тоқталды.

Президенттің айтуынша, қазақ даласынан шыққан ұлы ғұламалар – Әл-Фараби, Қожа Ахмет Ясауи және Абай адамзат өркениетіне өлшеусіз үлес қосқан тұлғалар.

– Біз зияткерлік мұрамызды мақтан тұтамыз. Олардың еңбектері әлемдік ақыл-ойдың алтын қорына кіреді. Сондықтан бұл баға жетпес мұраны заман талабына сай тиімді пайдалануымыз керек, – деді Мемлекет басшысы.

Тоқаев ойшылдар мен ғалымдардың еңбегін терең зерттеп, кеңінен дәріптеудің маңызын атап өтті. Оның сөзінше, ұлы тұлғаларды ұлықтау жұмысына жаңа серпін беру қажет.

Президент Түркістанда «Қожа Ахмет Ясауи» орденін енгізу бастамасының мәні де осы бағытпен байланысты екенін айтты. Сонымен қатар өткен жылы Ясауи ілімін зерттеуге арналған халықаралық симпозиум өткенін еске салды.

Мемлекет басшысы Қожа Ахмет Ясауиді тек рухани көшбасшы ғана емес, сонымен қатар ғұлама ғалым әрі өркениеттанушы ретінде елімізде және шетелде кеңінен таныту қажеттігін жеткізді.

Сондай-ақ Президент биыл бұл дәстүр Әл-Фараби форумымен жалғасатынын айтып, мұндай ғылыми маңызы зор жиындарды тұрақты түрде өткізу маңызды екенін атап өтті.