Ержан Қазыханға АҚШ-пен келіссөздер бойынша Президент өкілінің міндеті жүктелді

Мемлекет басшысының өкімімен Женева қаласындағы (Швейцария) Біріккен Ұлттар Ұйымының бөлімшесі мен өзге де халықаралық ұйымдар жанындағы Қазақстан Республикасының Тұрақты өкілі Ержан Хозеұлы Қазыханға Америка Құрама Штаттарымен ынтымақтастықтың өзекті мәселелері бойынша келіссөздер процесіндегі Қазақстан Республикасы Президентінің Өкілі міндеттері жүктелді.

Бұл шешім Қазақстан мен АҚШ арасындағы стратегиялық әріптестікті нығайтуға, саяси-дипломатиялық өзара іс-қимылды дамытуға және халықаралық алаңдардағы келіссөздер тиімділігін арттыруға бағытталған.

Ержан Қазыхан халықаралық дипломатия саласында мол тәжірибеге ие. Ол бұған дейін Қазақстанның сыртқы саясатын іске асыруда және халықаралық ұйымдармен өзара байланыс орнатуда бірқатар жауапты қызметтер атқарған.

Жаңа өкілеттік Қазақстанның сыртқы саяси бастамаларын ілгерілетуге, сондай-ақ екіжақты ынтымақтастықтың басым бағыттары бойынша нақты келісімдерге қол жеткізуге мүмкіндік береді.