Дін еркіндігі: жауапкершілікпен өлшенеді

Қазір қоғамда түрлі көзқарас пен пікірдің қатар өмір сүруі — қалыпты құбылыс. Дін саласында да әртүрлі түсінік, бағыт, мектеп бар. Бұл тарихтан келе жатқан табиғи үдеріс. Алайда діни пікір алуандығы шексіз еркіндік дегенді білдірмейді. Оның да қоғам тыныштығы мен адам қауіпсіздігін қорғауға бағытталған белгілі бір шегі бар.

Дін – адамның ішкі сенімі мен рухани таңдауы. Әркім өз сенімін ұстануға құқылы. Бірақ сол сенім өзгеге қысым көрсетуге, жек көрушілік тудыруға немесе заңды бұзуға негіз болмауы тиіс. Егер діни пікір қоғамдағы келісімді бұзып, адамдарды бөлінуге шақырса, бұл жерде еркіндік емес, жауапкершілік туралы сөз қозғалады.

Қауіп көбіне дінді саяси немесе жеке мақсатқа пайдаланудан туындайды. Кейбір радикалды топтар өз көзқарасын «жалғыз ақиқат» ретінде ұсынып, өзгеше ойлайтындарды жоққа шығарады. Мұндай ұстаным диалогты тоқтатып, қоғамда сенімсіздік пен үрей қалыптастырады.

Сондықтан зайырлы мемлекет ұстанымында діни сенімге құрмет бар, бірақ заң бәріне ортақ. Діни пікір еркіндігі – адам құқығы. Ал заңды, қоғамдық тәртіпті және өзге адамның құқығын бұзу – сол еркіндіктің шегі.

Шынайы сенім мәжбүрлеуде емес, түсіністік пен сабырда. Ал тұрақты қоғам әртүрлі пікірге төзімді, бірақ ортақ ережеге бағынатын қоғам.