Жаңа кешен – жаңа мүмкіндік

Семейде жаңа спорт кешенінің құрылысы басталып, бір аудан үшін көптен күткен мүмкіндік пайда болды.

Қалада дене шынықтыру-сауықтыру кешенінің іргетасын қалау рәсімі өтті. Жоба «Абайға құрмет» акциясы аясында жүзеге асырылуда. Шараға облыс әкімі Берік Уәли мен «Самұрық-Қазына» АҚ басқарма төрағасы Нұрлан Жақыпов қатысты.

Аймақ басшысы бұл нысанның маңызына ерекше тоқталды.

— Бұл кешен тұрғындардың спортпен тұрақты айналысуына жол ашады. Әсіресе жастар үшін маңызды. Бұл – денсаулық пен болашаққа салынған инвестиция, — деді Берік Уәли.

Жаңа нысан Семейдің оң жағалауында, Сәтбаев көшесінде салынады. Екі қабатты кешеннің жалпы ауданы 2000 шаршы метрді құрайды. Мұнда бокс және күрес залдары, тренажер залы, түрлі спорт алаңдары мен 100 орындық көрермен трибунасы болады. Ғимарат лифтпен жабдықталып, барлық тұрғындарға, оның ішінде мүмкіндігі шектеулі жандарға да қолжетімді болады.

Жобаның құны шамамен 1,6 млрд теңге. Қаржыландыру «Самұрық-Қазына» қоры арқылы жүзеге асырылып жатыр.

— Бұл нысан қала тұрғындары үшін маңызды спорт орталығына айналады, — деді Нұрлан Жақыпов.

Айта кетейік, «Абайға құрмет» акциясы аясында Семейде бірқатар әлеуметтік нысандар салынып жатыр. Бұл жобалар қаланың дамуына жаңа серпін бермек.