Зейнеткерлерді алаяқтардан қорғайтын жаңа талап

Қазақстанда 65 жастан асқан азаматтарға несие рәсімдеу тәртібіне қосымша талап енгізілді. Енді егде жастағы азаматтар несие алу үшін банк бөлімшесіне жеке баруы тиіс. Бұл өзгеріс телефон алаяқтарының құрбаны болатын зейнеткерлерді қорғауға бағытталған.

Ұлттық банк төрағасы Тимур Сүлейменовтің айтуынша, соңғы уақытта алаяқтар егде жастағы адамдарды телефон арқылы алдап, онлайн несие рәсімдеуге мәжбүрлейтін жағдайлар жиілеген. Көп жағдайда жәбірленуші биометриялық сәйкестендіруден өтіп, несие рәсімдеп, кейін қаражатты алаяқтардың есепшотына өз қолымен аударады.

Осыған байланысты 65 жастан асқан азаматтарға несие беру кезінде олардың банк бөлімшесіне жеке келуі міндеттелді. Банк қызметкері клиентпен тікелей сөйлесіп, несие алудың мақсатын анықтауы қажет.

Егер менеджер азаматтың үшінші тұлғаның ықпалында екенін байқаса немесе клиент несие алуға телефон арқылы біреудің нұсқау бергенін айтса, банк несие беруден бас тартуға міндетті.

Ұлттық банк басшысы бұл талаптың орындалуын Қаржы нарығын реттеу және дамыту агенттігі қадағалайтынын айтты. Агенттік банктердің жаңа тәртіпті сақтап отырғанын тексеріп, бақылау жүргізеді.

Жаңа талаптың негізгі мақсаты – қаржылық алаяқтықтың алдын алып, зейнеткерлердің қаражатын қорғау.