Университетте инклюзивті орта және заманауи дәрісханалар ашылды
Шәкәрім университетінде білім беру сапасын арттыруға, қолжетімді орта қалыптастыруға және халықаралық ынтымақтастықты кеңейтуге бағытталған бірқатар жаңа инфрақұрылымдық нысандар пайдалануға берілді. Бұл бастамалар университеттің адамға бағдарланған даму стратегиясының нақты көрінісі болып отыр.
Инклюзивті білім беру ресурстық-даму орталығы
Университет қаражаты есебінен жабдықталған Инклюзивті білім беру ресурстық-даму орталығы ерекше білім қажеттілігі бар балалар мен студенттерге қолайлы жағдай жасауға бағытталған. Орталық бірнеше арнайы кабинеттен тұрады және түзете-дамыту сабақтарын, психологиялық әрі педагогикалық қолдауды ұйымдастыруға мүмкіндік береді.
Ректор атап өткендей, инклюзия – ұран емес, нақты кеңістік пен жүйелі қолдаудан басталатын университеттің тұрақты ұстанымы.
Заманауи инфрақұрылым және ғылым
Іс-шара аясында 150 орындық №314 дәрісхана ашылды. Аудитория күрделі жөндеуден өтіп, ресурстары толық жаңартылып, заманауи LED экранмен жабдықталған. Мұнда университет ғалымдары жеңіп алған «Шәкәрім Құдайбердіұлының рухани мұрасын кешенді зерттеу» бағдарламалық-нысаналы ғылыми жобасының алғашқы нәтижелері таныстырылды. Бұл дәрісхана ғылыми-зерттеу және білім беру үдерісін жаңа деңгейге көтеруге мүмкіндік береді.
Халықаралық серіктестік
Шәкәрім университеті мен Түркия ғалымдарының ғылыми ынтымақтастығы нәтижесінде, TİKA ұйымының қолдауымен №217 Түрік тілі дәрісханасы пайдалануға берілді. Жаңа аудитория халықаралық академиялық байланыстарды нығайтып, көптілді білім беру ортасын дамытуға бағытталған.
Жаңадан ашылған білім кеңістіктері – университеттің заманауи талаптарға сай жаңғыруының және сапалы, қолжетімді білім беруге бағытталған жүйелі жұмысының нәтижесі.
