Мемлекеттік қызметшілерге жаңа жеңілдіктер қарастырылды
Қазақстанда мемлекеттік қызмет жүйесінде әлеуметтік қолдауды күшейтуге бағытталған жаңа нормалар енгізілуде. Атап айтқанда, жүкті әйелдер мен ерекше санаттағы қызметкерлер үшін еңбек жағдайларын жеңілдету көзделіп отыр.
Жаңа талаптарға сәйкес, мемлекеттік қызметшілердің күнделікті жұмыс уақыты 8 сағаттан аспайды, ал апталық еңбек жүктемесі 40 сағат шегінде белгіленеді. Бұл жалпы еңбек тәртібін нақтылап, қызметкерлердің құқықтарын қорғауға бағытталған.
Сонымен қатар, І және ІІ топтағы мүгедектігі бар мемлекеттік қызметшілер үшін қысқартылған жұмыс уақыты қарастырылған. Енді олар аптасына 36 сағаттан артық жұмыс істемейді.
Әлеуметтік тұрғыда қолдауды қажет ететін қызметкерлер үшін де бірқатар жеңілдіктер енгізілді. Атап айтқанда, жүкті әйелдерге, үш жасқа дейінгі баласы бар ата-аналардың біріне, сондай-ақ науқас отбасы мүшесіне күтім жасайтын қызметшілерге толық емес жұмыс күні белгілеу мүмкіндігі беріледі.
Мамандардың айтуынша, бұл өзгерістер мемлекеттік қызметшілердің еңбек жағдайын жақсартып қана қоймай, жұмыс пен отбасы арасындағы тепе-теңдікті сақтауға мүмкіндік береді.
