Алакөл маусымға дайын ба?
Абай облысында жазғы туристік маусым қарсаңында Алакөл жағалауының дайындығы басты назарға алынды. Облыс әкімі Берік Уәлидің төрағалығымен өткен кеңейтілген аппараттық кеңесте өңірдегі туристік инфрақұрылым, қауіпсіздік және қызмет көрсету сапасы жан-жақты талқыланды.
Бүгінде Алакөл – облыстың негізгі туристік нысандарының бірі. Осыған байланысты жағалауды дамытуға бағытталған кешенді жұмыстар қолға алынған. Қазіргі уақытта бас жоспарға өзгерістер енгізіліп, жағалау аумағын 300 гектардан 3000 гектарға дейін ұлғайту жоспарланып отыр. Сонымен қатар 2026–2028 жылдарға арналған арнайы жол картасы бекітіліп, 43 іс-шараны қамтитын жобалар жүзеге асырылуда.
Дайындық аясында жағалауды нығайту, жаңа электр желілері мен қосалқы станциялар салу, су және кәріз жүйелерін тарту, сондай-ақ қатты тұрмыстық қалдықтар полигонын салу көзделген. Туристер қауіпсіздігі үшін өрт сөндіру депосы салынып, бейнебақылау жүйелері орнатылмақ. Бұдан бөлек, жағалау аумағында абаттандыру, жарықтандыру жұмыстары жүргізіліп, жаяу және веложолдар, санитарлық нысандар салынуда.
Туризмді жүйелі дамыту үшін өңірде «VISIT ABAI» мекемесі құрылып, барлық туристік нысандар бірыңғай цифрлық платформаға біріктірілуде. «Abai Travel» мобильді қосымшасы арқылы туристерге бағыт-бағдар, брондау және қажетті ақпарат алу мүмкіндігі ұсынылады.
Жалпы, атқарылып жатқан жұмыстар Алакөлдің туристерді қабылдау мүмкіндігін арттыруға бағытталған. Дегенмен, негізгі міндет – жоспарланған жобаларды уақытылы әрі сапалы аяқтау. Облыс әкімі бұл бағыттағы жұмыстарды күшейтіп, инфрақұрылым мен қызмет көрсету деңгейін толық талапқа сай етуді тапсырды.
Осылайша, Алакөл жағалауында ауқымды жаңғырту жұмыстары жүріп жатыр. Жоспар толық жүзеге асса, алдағы уақытта өңір туристерді жоғары деңгейде қабылдай алатын ірі демалыс орталықтарының біріне айналмақ.
