Полицияға құрмет — қауіпсіз қоғам кепілі
Абай облысы Полиция департаменті құқық бұзушылықтардың алдын алу және қоғамдық қауіпсіздікті қамтамасыз ету бағытында түсіндіру жұмыстарын тұрақты түрде жүргізіп келеді. Бұл шаралардың басты мақсаты — ішкі істер органдары қызметкерлерінің қызметін қорғау және қоғамда құқықтық мәдениетті қалыптастыру.
Құзырлы орган өкілдері полицияның заңды талаптарын сақтау — қоғамдық тәртіп пен тұрақтылықтың негізгі кепілі екенін атап өтеді. Себебі тәртіпке бағыну тек жеке қауіпсіздік емес, тұтас қоғамның тыныштығына әсер етеді.
Қазақстан Республикасының заңнамасына сәйкес, полиция қызметкерлеріне қарсы бағытталған кез келген заңға қайшы әрекет жауапкершілікке әкеледі. Мәселен, билік өкілін қорлау айыппұлдан бастап қамаққа алуға дейінгі жазамен жазаланады. Ал мұндай әрекеттер көпшілік алдында немесе әлеуметтік желілер арқылы жасалса, жаза одан да қатаңдай түседі.
Сондай-ақ полицияның заңды талабына бағынбау, әсіресе төтенше жағдай кезінде, ірі көлемдегі айыппұл немесе бас бостандығынан айыру жазасына дейін әкелуі мүмкін. Ал билік өкілдеріне қатысты қорқыту немесе күш қолдану әрекеттері қылмыстық жауапкершілікке жатады және мұндай құқық бұзушылықтар үшін бірнеше жылға дейін бас бостандығынан айыру жазасы қарастырылған.
Әкімшілік құқық бұзушылық туралы кодекске сәйкес, полиция қызметкеріне құрметсіздік таныту, былапыт сөз айту немесе арандату әрекеттері де жауапсыз қалмайды. Мұндай жағдайда айыппұл салу немесе әкімшілік қамаққа алу шаралары қолданылады.
Жалпы, полиция қызметкерлерінің заңды қызметіне кедергі келтіру — қоғамдағы тәртіпті бұзып қана қоймай, азаматтардың қауіпсіздігіне тікелей қауіп төндіреді. Сондықтан кез келген заңсыз әрекет міндетті түрде тиісті жауапкершілікке әкеледі.
Абай облысы Полиция департаменті тұрғындарды заң талаптарын сақтауға, құқықтық сауаттылық танытып, билік өкілдеріне құрметпен қарауға шақырады. Бұл — қоғамдағы қауіпсіздік пен тұрақтылықты сақтаудың маңызды шарты.
