Берік Уәли «Семей» клубының басшылығымен кездесті

Облыс әкімі Берік Уәли «Семей» футзал клубының бас директоры Азамат Асылханмен кездесті. Кездесуде өңірде футзалды дамыту және клубтың алдағы жоспары сөз болды.

Аймақ басшысы қысқа уақытта жоғары нәтиже көрсеткен команданың еңбегін атап өтті. Клуб 2023 жылы құрылғанымен, екі жыл қатарынан Қазақстан кубогын жеңіп алды. Былтыр финалда «Ақтөбе» командасын 5:2 есебімен ұтты. Сонымен қатар «Семей» УЕФА Чемпиондар лигасында үздік сегіздікке енді.