Елімізде туберкулезбен күресте оң динамика байқалады

Қазақстанда туберкулезбен сырқаттану, өлім-жітім және аурудың таралу деңгейі тұрақты түрде төмендеп келеді. Бұл туралы Денсаулық сақтау министрі Ақмарал Әлназарова Дүниежүзілік туберкулезге қарсы күрес күні қарсаңында өткен жоғары деңгейдегі диалог барысында мәлімдеді.

Министрдің айтуынша, елімізде ауруды ерте анықтауға бағытталған заманауи тәсілдер кеңінен енгізілген. Атап айтқанда, туберкулезді бірнеше сағат ішінде анықтауға мүмкіндік беретін молекулалық-генетикалық диагностика әдістері қолданысқа енді. Сонымен қатар, зертханалық қызметтерге қолжетімділік барлық өңірлік фтизиопульмонология орталықтарында қамтамасыз етілген.

Емдеу саласында да маңызды өзгерістер бар. Қысқамерзімді және толықтай пероральдық емдеу режимдері енгізіліп, бұл науқастар үшін ем қабылдау процесін жеңілдетіп, оның тиімділігін арттыруға ықпал етуде. Нәтижесінде емдеу ұзақтығы қысқарып, пациенттердің өмір сапасы жақсарып келеді.

Ресми деректерге сәйкес, соңғы үш жылда туберкулезбен сырқаттанушылық 13,3 пайызға, өлім-жітім 25 пайызға, ал аурудың таралуы 17,2 пайызға төмендеген. Сонымен бірге, дәріге сезімтал туберкулезді емдеудің тиімділігі 90,5 пайызды, ал дәріге төзімді түрінде 85,3 пайызды құрап отыр. Бұл көрсеткіштер халықаралық стандарттарға сәйкес келеді.

Сарапшылардың пікірінше, қол жеткізілген нәтижелер денсаулық сақтау жүйесінде жүргізілген жүйелі шаралардың тиімділігін көрсетеді. Алдағы кезеңде туберкулезді толық жою бағытындағы жұмыстар жалғасады.