Абай облысында «Қауіпсіз аула» жедел-профилактикалық іс-шарасы өтті
Азаматтардың тыныштығы мен қауіпсіздігін қамтамасыз ету, құқық бұзушылықтардың алдын алу мақсатында Абай облысы аумағында «Қауіпсіз аула» жедел-профилактикалық іс-шарасы өткізілді. Шара барысында полиция қызметкерлері тұрғын үйлер аулалары мен қоғамдық орындарда профилактикалық жұмыстарды күшейтті.
Нәтижесінде өңірде 230 құқық бұзушылықтың алдын алу мүмкін болды. Анықталған деректер бойынша заң талаптарына сәйкес түсіндіру жұмыстары жүргізіліп, әкімшілік шаралар қабылданды.
Атап айтқанда, қоғамдық орындарда алкогольдік ішімдік ішу немесе мас күйінде жүрудің 179 дерегі тіркелді. Азаматтарға қоғамдық тәртіп пен өзара сыйластықты сақтаудың маңызы түсіндірілді.
Сондай-ақ іс-шара барысында 15 ұсақ бұзақылық фактісі анықталып, құқық бұзушылармен профилактикалық әңгімелер жүргізілді.
Бұдан бөлек, 12 кәмелетке толмаған жасөспірім анықталып, олардың заңды өкілдерімен бірге алдын алу бағытында түсіндіру жұмыстары өтті. Жасөспірімдердің қауіпсіздігі мен тәртібіне ерекше назар аударылды.
Жалпы, «Қауіпсіз аула» шарасы тұрғындар үшін қауіпсіз әрі жайлы орта қалыптастыруға бағытталды. Абай облысы полициясы қоғамдық тәртіпті сақтау және құқық бұзушылықтың алдын алу жұмыстарын алдағы уақытта да жалғастырады.
